Solanke goli atrofida bahs: Gvardiola Husanovni himoya qildi

Angliya Premer-ligasining 24-turi Londondagi katta to‘qnashuvlardan biri bilan yodda qoldi. “Tottenhem” o‘z maydonida chempionlik poygasidagi asosiy da’vogarlardan biri — “Manchester Siti”ga qarshi o'yin o'tkazdi. Gvardiola jamoasi birinchi bo‘limda ishni juda “yopiq” qilib qo‘ygandek edi, ammo ikkinchi taymda maydonda butunlay boshqa “Tottenhem” ko‘rindi.

Uchrashuvning birinchi yarmida “shaharliklar” ikki to‘p farqi bilan oldinga chiqib oldi. Lekin tanaffusdan keyin “Tottenhem” yulduzi Dominik Solanke o‘yinga umuman boshqa ritm olib kirdi. U ikki bor darvozani “topib”, hisobni 2:2 ga keltirdi.

Solanke va Husanov to'qnashuvi

Eng ko‘p gap-so‘z aynan Solankening birinchi goli atrofida aylanyapti. O‘sha epizodda u to‘pga chiqish jarayonida o‘zbekistonlik himoyachi Abduqodir Husanov bilan to‘qnash keldi. Ijtimoiy tarmoqlarda ko‘pchilik bu yerda Solanke tomonidan turtish bo‘lganini yozmoqda, yana bir qismi esa Husanovni tanqid qilmoqda.

Muhokamalar shu qadar qizib ketdiki, ayrim muxlislar hatto “hujumchi Husanovni O‘zbekistonga qaytarib yubordi” qabilidagi gaplarni ham ishlatishdi. Biroq, mutaxassislar “Siti” himoyasi ikkinchi bo'limda umumiy sustlashganini ta'kidlashmoqda.

Gvardiola hakam qarorini tanqid qildi

Klub bosh murabbiyi Pep Gvardiola bu masalada Abduqodir Husanovni yolg'iz qoldirmadi. U tanqidni hakam qaroriga burdi va birinchi golda Solanke tomonidan ochiq fol bo'lganini ta'kidladi. Gvardiolaning fikricha, hujumchi himoyachini orqadan turtib yuborgan.

Murabbiyning aytishicha, “Tottenhem” foydasiga hisoblangan o'sha bahsli goldan keyin jamoada ruhiy-emotsional “sinish” yuz bergan. "Bunday vaziyatdan so‘ng, Angliya futbolida nima bo‘lishidan qat’i nazar, o‘yinni nazorat qilish juda qiyinlashadi," — deya qo'shimcha qildi u.

Turnir jadvalidagi holat

Tenglikdan keyin “Manchester Siti” ochkolarini 47 taga yetkazib, ikkinchi o‘rinda qolmoqda. Biroq peshqadam “Arsenal” g‘alaba qozongani sabab farq olti ochkoga chiqdi. Endi “shaharliklar”ni 8-fevral kuni safarda amaldagi chempion “Liverpul”ga qarshi o‘yin kutib turibdi.